Puthiyathalaimurai | Tamil News | Live TV | Tamil Live News | Mobile Live TV | Live Tamil News | Online Tamil News | PT Tamil News | Tamil News Live TV

தூர் வாரப்படாததால் துயரம்: கடலில் கரையும் நதிகள்

கடலூர் மாவட்டம் வழியாக கடலில் கலக்கும் தண்ணீரை சேமித்தால் காவேரி நீருக்காகக் கையேந்தத் தேவையில்லை என அம்மாவட்ட விவசாயிகள் கூறுகின்றனர். இங்கு மட்டும் ஆண்டுக்கு தோராயமாக 250 டிஎம்சி தண்ணீர் வீணாகக் கடலில் கலப்பதாக புகார் எழுந்துள்ளது. தென்பெண்ணை, கெடிலம், வெள்ளாறு, மணிமுத்தாறு, கொள்ளிடம் ஆகிய ஆறுகள் கடலூர் மாவட்டம் வழியாக ஓடி வீணாகக் கடலில் கலக்கின்றன. இதனைத் தடுக்க, ஆறுகளின் குறுக்கே தடுப்பணைகள் கட்டப்பட வேண்டும் என்பது இங்குள்ள விவசாயிகளின் நீண்ட கால கோரிக்கையாக இருக்கிறது. ஆண்டுக்கு கடலூரில் மட்டும் வீணாகக் கலக்கும் சுமார் 250 டிஎம்சி தண்ணீரைச் சேமித்தாலே, காவிரி நீருக்காக அண்டை மாநிலங்களில் நாம் கையேந்த வேண்டிய நிலை இருக்காது என்பது இம்மாவட்ட விவசாயிகளின் ஒட்டுமொத்த கருத்து.

வீணாகும் நதிநீர் கடலூரில் ஆண்டுதோறும் ஒவ்வொரு ஆற்றில் இருந்தும் வீணாக கடலில் கலக்கும் நீர்.. கொள்ளிடம் ஆற்றில் ஆண்டுக்கு 100 டி.எம்.சி தண்ணீர் கடலில் கலக்கிறது. கடந்த 2005ஆம் ஆண்டில் மட்டும் 345 டி.எம்.சி. தண்ணீர் வீணாக கடலில் கலந்தது.கடந்த 2001ஆம் ஆண்டில் இருந்து 2011ஆம் ஆண்டு வரை கொள்ளிடம் ஆறு வழியாக 1108 டி.எம்.சி தண்ணீர் கடலில் கலந்து வீணானது. தென்பெண்ணையாற்றில் கடந்த 2001 முதல் 2011ஆம் ஆண்டு வரை 117 டி.எம்.சி தண்ணீர் எந்தவித பயனும் இன்றி கடலில் கலந்தது. அதேபோல மணிமுத்தாறும் வெள்ளாறும் இணைந்து கடந்த 2001 முதல் 2011ஆம் ஆண்டு வரை 313 டி.எம்.சி தண்ணீர் வீணாக கடலில் கலந்தது. குப்பைக்கிடங்கான நதிக்கரை கடலில் கலக்கும் தண்ணீரை சேகரிக்க தடுப்பணை இல்லை என்பது ஒருபுறம் என்றால், மறுபுறம் இருக்கும் தண்ணீரை பாதுகாக்கவும் வழியில்லை கடலூரில். தென் பெண்ணையாறு, கெடிலம் ஆறு, பரவனாறு, வெள்ளாறு, மணிமுத்தாறு, கொள்ளிடம் என கடலூர் மாவட்டம் முழுவதும் ஜீவ நதிகளாக பாய்கிறது. இத்தனை ஆறுகள் ஓடியும் அவை முறையாக பராமரிக்கப்படாமல் பல்வேறு கழிவுகளின் கலப்பால் தண்ணீர் விஷமாக்கப்படுவதாக குற்றம் சாட்டுகின்றனர் சமூக ஆர்வலர்கள். கடலூர் நகராட்சிக்கென 2 குப்பைக்கிடங்குகள் இருந்தும் குப்பைகள் அனைத்தும் நதிக்கரையில் கொட்டப்படுவதாக குற்றம் சாட்டுகின்றனர் இப்பகுதியில் வசிக்கும் மக்கள். குறிப்பாக இறைச்சி, மருத்துவ கழிவுகள், என அனைத்தும் இங்கு கொட்டப்படுகின்றன. அனைத்து வகையான கழிவுகளும் கொட்டப்படுவதால் நோய் பரவும் அபாயம் ஏற்பட்டுள்ளது. இவ்வாறு தண்ணீர் மற்றும் காற்று மாசுபடுத்தப்படுவது தண்டிக்கப்பட வேண்டிய குற்றம் என்று கூறும் சுற்றுச்சூழல் ஆர்வலர்கள், குப்பை மேலாண்மைத் திட்டம் சரியாக செயல்படுத்தப்படவில்லை என்ற புகாரையும் முன்வைக்கின்றனர். பொதுமக்களின் இந்த குற்றச்சாட்டுகள் குறித்து மாசுக் கட்டுப்பாட்டு வாரிய அதிகாரிகளைக் தொடர்பு கொண்டு கேட்ட போது , ஆற்றில் அப்படி கழிவுகளை கொட்டுவது தவறு அப்படி இருந்தால் நடவடிக்கை எடுப்போம் என பதில் அளித்தனர். காணொளி: http://puthiyathalaimurai.tv/video-gallery?video=4140

கருத்துக் கணிப்பு

Loading ...